Паводле паведамлення інфармацыйнага агенства БелТА пасольства Беларусі ў Францыі дамовілася з нашчадкамі вядомага мастака Парыжскай школы Шрагі Царфіна аб набыцці 15 яго карцін для вяртання ў Беларусь – на радзіму жывапісца.

Работы былі набыты для карпаратыўнай калекцыі групы кампаній "А-100". У пачатку мая іх даставілі ў Беларусь, усе мытныя працэдуры ўжо завершаны, ідзе падрыхтоўка выставы. Плануецца адкрыццё экспазіцыі ў Мінскім абласным краязнаўчым музеі ў Маладзечне, паколькі сам мастак быў родам са сталічнага рэгіёна.

Вернутыя работы Шрагі Царфіна выкананы ў розных тэхніках жывапісу і прадстаўляюць розныя перыяды яго творчасці. Гэта дасць магчымасць стварыць цэласнае ўражанне аб творчым шляху мастака. На гэты момант калекцыя з 15 карцін з'яўляецца буйнейшым у Беларусі зборам работ жывапісца.

img

Файбіш-Шрага Царфін нарадзіўся ў 1900 годзе ў мястэчку Смілавічы Ігуменскага павета Мінскай губерні. Пачатковую мастацкую адукацыю атрымаў у Віленскай мастацкай школе. У 1914 годзе ён эмігрыраваў у Палесціну. У пачатку 1920-х гадоў вырашыў паехаць у Еўропу і прадоўжыць навучанне. У 1923 годзе займаўся ў Берліне, а ў 1924 годзе пераехаў у Парыж. Разам з заняткам жывапісам Шрага Царфін працаваў у галіне мастацкага тэкстылю, кніжнай графікі. У 1947 годзе пераехаў у французскі гарадок Роні-су-Буа, дзе жыў да самай смерці. Памёр у 1975 годзе. Палотны мастака захоўваюцца ў музеях Францыі, Вялікабрытаніі, Германіі, ЗША і Ізраіля, дзве карціны знаходзяцца ў калекцыі Нацыянальнага мастацкага музея Беларусі, яшчэ 12 - у карпаратыўнай калекцыі Белгазпрамбанка.

img

Фота і матэрыялы са старонкі БелТА https://blr.belta.by/culture/view/u-belarus-vjarnulisja-15-kartsin-mastaka-paryzhskaj-shkoly-shragi-tsarfina-78016-2019/