Назва Мастацтва камуны / Искусство коммуны

Нацюрморт з’яўляецца, відавочна, звычайнай вучэбнай пастаноўкай, выкананай з элементамі кубізму, але гэтаму твору, у якім адбіўся той час з яго аскетычнасцю і неўтаймаванымі марамі, было наканавана стаць свайго кшталту эмблемай віцебскай мастацкай школы першага паслярэвалюцыйнага перыяду. Справа ўнізе чорным: М.Кунин 19.

Назва твора мае падвойны сэнс: як вызначэнне адбітку ў мастацтве густаў пэўнага сацыяльна-культурнага асяродку і як назва рэальнага выдання, выяву якога ўтрымлівае твор. «Искусство коммуны» — штотыднёвая газета, якая выдавалася ў Петраградзе “отделом изобразительных искусств Комиссариата народного просвещения”. Выходзіла са снежаня 1918 па красавік 1919. Усяго выйшла 19 нумароў. З’яўлялася органам петраградскіх футурыстаў. У № 2 ад 15 снежня 1918 г. быў надрукаваны артыкул Я.Черняк “Витебск”. Выяўлены № 8 ад 26.1.1919 газеты «Искусство коммуны». На першай старонцы газеты, пад яе назвай размешчаны лозунг: “ДОВОЛЬНО ШАГАТЬ ФУТУРИСТЫ! В БУДУЩЕЕ – ПРЫЖОК!”. Ранейшае месцазнаходжанне (матэрыялы, прадастаўленыя Віцебскім абласным краязнаўчым музеем): 1919–1925 – Музей сучаснага мастацтва ў Віцебску, Віцебскі мастацкі тэхнікум / Беларускі дзяржаўны мастацкі тэхнікум; 1925–1939 – Віцебскае аддзяленне БДМ / Віцебскі культурна-гістарычны музей / Віцебскі сацыяльна-гістарычны музей / Віцебскі абласны дзяржаўны гістарычны музей. У 1939 годзе твор быў перададзены ў Дзяржаўную карцінную галерэю. Вывезены з Мінска, відавочна, у 1944 годзе. Паступіў у Дзяржаўны мастацкі музей БССР у 1957 годзе з “Дирекции художественных выставок и панорам министерства культуры СССР” (Масква), у ліку іншых твораў, вернутых з Германіі ў 1953. Акт № 117 ад 21.08.1957 аб прыёме на пастаяннае захоўванне. Iнфармацыя прадастаўлена ўстановай “Нацыянальны мастацкі музей Рэспублікі Беларусь”(2024 г.)