Дакументы віцебскай экспедыцыі Камісіі па ахове гісторыка-культурнай спадчыны БССР 1939 г.

Дакументы, створаныя ў часе экспедыцыі Камісіі па ахове гісторыка-культурнай спадчыны БССР 1939 года па Віцебшчыне. Утрымліваюць фатаграфіі гістарычных помнікаў і месцаў, а таксама рукапісныя гістарычныя даведкі пра іх. У пераліку вывучаных экспедыцыяй месцаў: Абольцы, Бачэйкава, Бешанковічы, Высокі Гарадзец, Віцебск, Ворша, Гарадок, Дзятлава, Дрыса, Здраўнева, Ключнікава, Копысь, Лукомль, Полацк, Сівошын Перавоз, Сіроцін, Смаляны, Стасева, Талачын, Чарэя, Якімань і інш. Аўтэнтычнасць дакументаў пацверджана праведзенай у 2019 г. экспертызай.

Дакументы ўтрымліваліся ў прыватным архіве ўдзельніка экспедыцыі пісьменніка Юркі Віцьбіча і разам з ім пасля Другой сусветнай вайны апынуліся ў ЗША. Уладальнік перадаў дакументы разам з часткай свайго архіва на захаванне ў царкву Св. Еўфрасінні Полацкай у горадзе Саўт-Рывер (штат Нью-Джэрсі). У 2017 г. беларускі дзеяч у ЗША Янка Запруднік, які разбіраў архівы згаданай царквы, пераслаў дакументы Юркі Віцьбіча, у тым ліку і дакументы экспедыцыі ў Беларускі дзяржаўны архіў-музей літаратуры і мастацтва. Інфармацыйныя матэрыялы прадастаўлены ўстановай "Беларускі дзяржаўны архіў-музей літаратуры і мастацтва" (2020 г.)