На партрэце амаль на ўвесь рост намаляваны князь Дамінік Іеранім Радзівіл, які абапіраецца на невялікі ўзгорак. Князь апрануты ў фрак цёмнага колеру і светлыя штаны. На галаве цыліндр. У правай руцэ трымае плётку, у левай белую шаўковую пальчатку. На фраку – узнагароды: ордэн «Virtuti Militari», ордэн і зорка Св. Губерта, мальтыйскі крыж, ордэн Ганаровага легіёна.

Твор знаходзіўся ў галерэі Нясвіжскага замка. Партрэт згадваецца пад № 79 у інвентары маёмасці, датаваным 1857 г. Гэты ж нумар, пастаўлены белай фарбай, прысутнічае і на партрэце. Пасля нацыяналізацыі замка ў Нясвіжы мастацкія зборы князёў Радзівілаў перавезлі ў Мінск. Партрэт Дамініка Іераніма прызначаўся для калекцыі Дзяржаўнай карціннай галерэі БССР, на што ўказваюць нумары на падрамніку «112 гкг» і «320 гкг». Партрэт вывезены з Мінска ў Германію ў 1944 г. Пры вывазе партрэт атрымаў нумар 156 чырвоным алоўкам. У Гохштадце партрэту надалі № 1454/4. 19.11.1945 г. перавезены на Цэнтральны зборны пункт у Мюнхене. Нумар у рэстытуцыйнай картцы № 15420. 15.04.1947 адпраўлены ў Берлін і перададзены прадстаўнікам СССР. Выява партрэта будзе апублікавана пры атрыманні дазвола. Інфармацыя прадастаўлена Нацыянальнай акадэміяй навук Беларусі.