Абраз Магілёва-Брацкай Маці Божай

Іканапіс. Арыгінал адсутнічае, захаваліся толькі копіі. Прадстаўлена фота копіі

Лічыцца, што Абраз Магілёва-Брацкай Божай Маці з’явіўся падчас вайны Расіі і Рэчы Паспалітай 1654 – 1667 гг. У 1655 г., падчас аблогі Магілёва войскамі гетмана ВКЛ Януша Радзівіла гэты абраз быў вынесены з Богаяўленскай брацкай царквы і з хросным ходам быў абнесены па горадзе. Войскі Радзівіла знялі аблогу, што лічыцца першым праяўленнем дзівоснага заступніцтва абраза над магілёўцамі. У 1708 г. паплечнік Пятра І Аляксандр Меншыкаў падчас знаходжання ў Магілёве расійскай арміі задумляў вынішчэнне ўсіх гараджан у помсту за паўстанне супраць рускіх войскаў у 1661 г., калі быў знішчаны ўвесь магілёўскі гарнізон рускіх войскаў. Аднак падчас малітвы перад абразам Магілёва-Брацкай Божай Маці Меншыкаў знепрытомнеў і вырашыў адмовіцца ад знішчэння магілёўцаў. Гэта лічыцца другім праяўленнем цудадзейнай моцы абраза. Пазней абраз шанаваўся як праваслаўнымі, так і каталікамі. Пасля рэвалюцыі 1917 г. і закрыцця Богаяўленскай царквы лёс абраза невядомы. Захаваліся копіі абраза ХІХ ст. Інфармацыя прадастаўлена музеем гісторыі Магілёва (2020 г.)